អ្នកមានផ្ទៃពោះ កុំសូវរាប់អានមនុស្ស៥ប្រភេទនេះពេក ប្រយ័ត្ន…

អំឡុងពេលមានផ្ទៃពោះ គ្រូពេទ្យជំនាញតែងឱ្យដំបូន្មានពីរឿងសុវត្ថិភាពក្នុងការញ៉ាំ ដេក ដើរ ឈរ អង្គុយដើម្បីធានាសុខភាពទាំងម្ដាយនិងគភ៌។ ប៉ុន្តែក្រៅពីរបបអាហារ និងឥរិយាបថប្រចាំថ្ងៃ បញ្ហាផ្លូវអារម្មណ៍ក៏ជារឿងសំខាន់ណាស់ដែរ ដែលអនាគតម្ដាយគួរតែយកចិត្តទុកដាក់។

មានមនុស្សមួយចំនួនដែលអ្នកមិនគួររាប់រកក្នុងរយៈពេលនេះ ព្រោះវាអាចបណ្ដាលឱ្យប៉ះទង្គិចផ្លូវចិត្តបាន។

១- មនុស្សដែលចូលចិត្តនិយាយបំភ័យ៖

បើអ្នកបានជួបមនុស្ស ឬមិត្តភ័ក្ដិដែលតែងនិយាយថា ភ័យខ្លាចរឿងមានកូន គួរតែចៀសវាងឱ្យឆ្ងាយសិនទៅ មិនបាច់សួរនាំ ឬជិតស្និទ្ធនឹងពួកគេទេ ព្រោះអ្នកទាំងនោះអាចនឹងធ្វើឱ្យអារម្មណ៍របស់អ្នកភ័យខ្លាចចំពោះការពរពោះនៅពេលនេះ។ ជាទូទៅ មនុស្សប្រភេទនេះនឹងសួរអ្នកនូវសំណួរមួយចំនួនដូចជា តើឯងទ្រាំឈឺពេលឆ្លងទន្លេបានទេ? ឯងចង់សម្រាលដោយការវះកាត់ឬក៏អី? ណែបើឯងវះ វាអាច… ជាដើម។

២- មនុស្សដែលធ្លាប់មានប្រវត្តិមិនជោគជ័យក្នុងពេលឆ្លងទន្លេ៖

មិនមែនរើសអើង ឬស្អប់ខ្ពើមពួកគេទេ ប៉ុន្តែឆ្លងតាមបទពិសោធន៍បរាជ័យ ឬជួបរឿងអាក្រក់របស់ពួកគេ អាចនឹងធ្វើឱ្យអារម្មណ៍របស់អ្នកមិនមានសុវត្ថិភាពចំពោះអ្វីដែលអ្នកនឹងឆ្លងកាត់នៅប៉ុន្មានខែខាងមុខនេះ។ ដូច្នេះ ជាការល្អ គួរតែនៅឱ្យឆ្ងាយពីពួកគេសិន ព្រោះអ្នកនឹងអាចភ្លេចគិតថាមានមិត្តភ័ក្ដិដែលធ្លាប់ឆ្លងកាត់រឿងនេះ ហើយនឹងនៅតែរីករាយចំពោះថ្ងៃសម្រាលខាងមុខ។

៣- មនុស្សចូលចិត្តច្រណែន៖

អ្នកខ្លះមិនទាន់ទាំងរៀបការផង ក៏កើតចិត្តច្រណែនដែលឃើញគេមានផ្ទៃពោះ ហើយអ្នកខ្លះបន់ឱ្យតែឃើញគេជួបបញ្ហាក៏មាន។ វាមិនមែនទាំងអស់ ប៉ុន្តែបើអ្នកធ្លាប់ដឹងថា មនុស្សម្នាក់នោះតែងមានចិត្តច្រណែនគេឯង ទោះរឿងអ្វីក៏ដោយនោះ គួរនៅឱ្យឆ្ងាយពីពួកគេ ព្រោះគេនឹងបញ្ចេញកាយវិការណាមួយធ្វើឱ្យប៉ះពាល់អារម្មណ៍របស់អ្នកជាមិនខាន។

៤- មនុស្សដែលឱ្យដំបូន្មានឥតប្រយោជន៍៖

កុំស្ដាប់ដំបូន្មានដែលឥតបានការច្រើនពេក ព្រោះការឆ្លងកាត់របស់មនុស្សតែងមានភាពខុសប្លែកពីគ្នា។ ហើយចំណុចខ្លះដែលមិនសមថាសំខាន់ក្នុងការអនុវត្តសោះ ក៏ត្រូវបានមនុស្សប្រភេទនេះយកមករ៉ាយរ៉ាប់បែកអូរហូរស្ទឹងដែរ។ អ៊ីចឹង កុំចំណាយពេលទៅស្ដាប់ច្រើនពេក មិនដូច្នោះទេ អ្នកគង់តែត្រូវបែងចែកខួរក្បាលគិតថា ចំណុចខ្លះគួរតែសាកអនុវត្តជាមិនខាន។

៥- មនុស្សដែលឆាប់បាក់ទឹកចិត្ត ឬកើតទុក្ខញឹកញាប់៖

ក្នុងរយៈពេលនេះ អ្នកមិនគួរនៅក្បែរមនុស្សដែលកើតទុក្ខញឹកញាប់ពេកទេ ព្រោះពេលមានផ្ទៃពោះ គឺជាពេលដែលឆាប់ប៉ះទង្គិចផ្លូវចិត្តខ្លាំងជាងគេ។ ដោយសារតែអារម្មណ៍ឈឺចាប់ ឬកើតទុក្ខរបស់អ្នកនៅក្បែរខ្លួន វាអាចជះឥទ្ធិពលដល់ផ្លូវចិត្តរបស់អ្នក ដែលបណ្ដាលឱ្យខួរក្បាលទៅជាគិតរឿងស្មុគស្មាញដោយមិនដឹងខ្លួន។ សរុបមកវិញ ម្ដាយកំពុងពរពោះដែលតែងតែរីករាយ និងស្រស់ស្រាយនឹងធ្វើឱ្យគភ៌នៅក្នុងផ្ទៃមានសុខភាពល្អទាំងផ្លូវកាយ និងផ្លូវចិត្តបានដូចគ្នា។ ដូច្នេះវាជារឿងសំខាន់បំផុតដែលអ្នកត្រូវតែថែរក្សាសុខភាពផ្លូវចិត្តរបស់អ្នកឱ្យបានមែនទែន ចៀសវាងមានការប៉ះទង្គិចដោយមជ្ឈដ្ឋាននៅជុំវិញខ្លួនដូចបានរៀបរាប់ខាងលើ។ រង់ចាំពេលសម្រាលរួច អ្នកអាចរាប់អានមនុស្សប្រភេទណាក៏បានតាមចិត្ត៕
ប្រភព៖ kanha ប្រែសម្រួល៖ fbgoo.co